يا غربة يا غشاشة

موضوع: يا غربة يا غشاشة السبت يونيو 26, 2010 3:00 pm

يا غربة .. يا غشاشة .. يا بكاية .. يا مستهبلة
تغرينا بي درهم قروش وراه قنطار بهدله
جيناك سنة .. أو قول سنين بنكمله
نبني البيوت في العاصمة
وبي كوم أثاث بنجملا
وكرولا حاره نرسلا أصلو التنقل مشكله
ونكمل الدين بي مهل والسمحة جاهزة نحصله
غير القروش اللي الأهل عبر الشهور حا نرسلا
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصلا
أحلام كتيره وشيقه وآمال كبيرة نأملا
لكن حساباتنا الغلط في كل عام بنرحله
مرت سنين من العمر بنعزها وبنفضله
والحسبة وصلت طاشرات يمكن نعيش وندبلا
وتعال نحاسبك يا وهم من غير رقم أو أمثله
كان للقروش نجري ونحوش لكن تقول بنشاكلا
ما راضية تقعد في الجيوب وتقول حرامي بينشلا
لكن بترقد في الضهور بديون تقيله متلتلا
ممحوقة ما بتقضي الغرض وأقل حاجة تكملا
كملانه سفرة وحق وزن ومجاملات مستفحله
وأحلامنا صبحت زي سراب نمشي ونجري ما نحصلا
يا ريت يكون هم القروش يا غربة فيك هو المعضله
لكن تعال شوف الهموم الما إفتكرنا نقابلا
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبله
أشغالو شاقة ومؤلمه ودايما تكون مستعجله
ما عاد يكفيها النهار تحتاج ليالي مليله
أمراض كتيره بدت معاك عايزه الفحوص مستعجله
ناس الضغط والسكري ومرض القلب مع الكلى
ومصران وقرحة وإكتئاب ونفوسنا ما متحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عاملا
عدم الرياضة والكونديشن لابد يكون ليهم صــــــلة
وكمان تعال لمعادلة ما قدرنا أصلا نعدلا
سجن العيال جوه الشقق وفراق الأهل والعائله
جيب العيال بي جيبنا مال وجيوبنا غيرو مميله
وصغارنا صبحت بالزهج متوحشة ومتجفله
لا قادرة تلعب في خلا ولا ضل شديره يضللا
لا قادرة تدرس بي نفس من الدروس المترهله
تلقي الولد غالبو الكلام والبت كبيرة ومريله
كل الضغوط سوا ما قدرنا حتى نقللا
في كل طرف تلقي القرف تلقي الخيوط مداخله
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدلا
آمالنا فيك بدري إتنست إلاّ الرجول متوحله
وبقينا زي أهل القبور لا البره عارف يدخلا
لا الجوه يرجع لي ورا يحكي الحقيقة يوصلا
لكن خلاص هان الخلاص عندك نزل مهما علا
وإن شاء الله نحيا نودعك وتكوني ذكرى نغازلا
يا غربة .. يا بكاية .. يا غشاشة .. يا مستهبله
[b]

السلام عليك ابو نبيل كلماتك رائعة تعبر بصدق وشفافية عن كل من بعد وطنه واهله رغم اني تغربت منذ شهور قرابة العام الا وكانني سنين بعيدة عن السودان واسال الله ان يعاود غربة الجميع بخير ونرجع وسط اهلنا الطيبين

جزاك الله خيرا اختنا مزدلفه وحتي لا أدعي حقا لا أملكه ، أفيدك بأن ابيات الشعر أعلاه ليست لي وانما ارسلت لي عبر البريد الالكتروني وقمت بانزالها في المنتدي عندما اعجبتني كلماتها ومست وترا حساسا .
بعدين يا أخت مزدلفه انتي لسع بدري عليك ، ناس العشرة والعشرين سنة يقولو شنو .

ربنا يرد غربة كل مسافر لاهلة ويعينكم على الغربة

ربنا يرد غربتكم فى ساعة خير

الاخ ابونبيل اولا هذه فرصة طيبةان نلتقي عبراثير هذى المنتدى بعد غربة غشاشة فوق العشرين سنة واخبار مقطوعة لاحس لاخبر واناسعيد ان تكون اول من نتواصل معه من جيلنا وزمن الصبا والغريب عن وطنو مهما طال غيابو مصيرو يرجع لي اهل وصحابو واسعد جدا ان نتواصل
اخوك استاذ عبد الله محمدخليل بنغازي