المرأة السودانية ... مكلفة بشكل!!!!!
--------------------------------------------------------------------------------
ملساء ما غبشاء .... نحاول و بشده ان نطبق احدى نظريات السمحة ام ولدى ... مشيت اشترى صندلية و كنت على وشك ان تجينى سكته قلبية لمن سيد المحل قال لى علبه الصندلية 100 مل ب80 ريال عمانى يعنى 800 ريال سعودى ..... يا نهار مش فايت صندليه بس 80 ريال .. ليه قال عشان ميسو هذا ميسو اصلى مافى تقليد .. مدام فى يريد رخيص فى نوع هذا اولاد الطاهر فى .... و انا مما فتحت فى الدنيا بعرف انو ميسو هى الاصلية و يا دوب كده قالوا التاج و بما انو الاسم مسموع فممكن يكون بديل بس عدم القناعة بانو الصندلية دى ما اصلية .. و طبعا نحن شعب نعجب فى التمسك بهذه الماركات الاصلية و لا نقبل اى بديل ... يعنى عشان اعمل ريحة التكلفة حتكون كم ... فرير دمور 7 ريال و نص ( 75 ريال سعودى) مع بقية الروائح و لاحظوا قزازة واحدة فقط من كل نوع يا دوب تشربى بيها ريحتك ده لو عندك عجنة جاهزة ( الحريم فقط حيفهموا هذه الجملة ) يعنى بالميت كده عايزة ليك ميزانية رهيبة عشان بس شوية ريحة ......
دى الريحة خلصنا منها نجى للتوب شىء مطرز و شىء مضغوط و آخر مطبوع و التانى مفقوع و جيب صاحبنا مفجوع.... للمناسبة تلاقى سعره الشىء و الشويات .....
نجى للحنة و اشكالها المختلفة و اسعارها المختلفة .... و للمواظبات بشكل اسبوعى الا تطلب مساهمة البنك الدولى...
الذهب ...وووب ... هبر هبر و غوايش و احفظ مالك بدور و دورين و سلاسل جنازير كرسى جابر و طربيزة فهد و مقعد عبد الله و دقن الخمينى و الشبح و الايواكس و خلافه من الكتل الفظيعة الما معروف تتلبس او تستخدم اسلحة دمار شامل و دى طبعا ميزانيتها ... لا صندوق بينفع و لا بنك دولى الموضوع عايز اختلاس عديييييل كده ....
الملايات ... عشقنا نحن النساء الملايات المطرزة و المزركشه ... بالسيتان وبالتل و الكثير من التشكليات و الطقم الواحد لا يقل عن 20 ريال عمانى ( 200 ريال سعودى) مش كده يا نسوان الرياض...
العدة .. ترامس و صوانى و اطقم مختلفة عاد كيف لازم تكون عندى حاجات فخمة لو جاتنى مناسبة على غفلة تقديم الحاجات باطقم مختلفة ضرورى ..... شوفى ياختى ما عندها غير الطقم ده و الترمسة اليتيمة دى و ميزانية تانية....
و هنالك الكثير و الكثير من التكاليف الرهيبة التى تمتاز بها المرأة السودانية و زايده فيها بشده .... اذا كانت عاملة يمكن نقول بتخفف شوية على جيب سى السيد اما اذا كانت غير عاملة كيفن عاد يا اولاد امى ...
المرأة السودانية حقيقة تكاليفها باهظة الثمن و مرات كثيرة سبب فى وقوع الرجل فى مشاكل لا ليها اول و لا آخر فقط لانها ما قادرة تطلع نفسها من هذا التقليد المكلف الاسمو شكل المرأة السودانية البيغير اتجاه الزول و مرات الزول زاتو يعنى الطفرات الجينية دى اصلها ما بتجى علينا و نتأثر بيها على الاقل رحمة بالجيب البقى ما عارف يغطى شنو و له شنو ...
اعزائى الشواطح عايزة رأيكم بصراحة فى تكاليف المرأة و هل بتفتكروا انو هذه الاشياء ضرورة ليكم عشان نكسر رقبتنا و نعملها ام بالنسبة ليكم هيافات و هل فى بدائل مناسبة للميزانية .... اكيد حتقولوا الولية دى جنت و بقت فى صفنا .. ابدا بس غايظنى سعر الصندلية... فى انتظار مداخلاتكم الاكيد حتكون مفيده ...